le junla zbasu

By Robert Louis Stevenson, xorxes

::le junla zbasu::

::fi'e la'o gy Robert Louis Stevenson gy::

                fanva fa la xorxes zoi gy 'The Clockmaker gy::

   ni'o lo botpi cu cpana lo jubme bu'u lo midju be lo kumfa i ze'a lo
   jeftu no da pagre lo vorme i lo lumci selfu na kurji gi'e na gasnu lo
   nu basti lo djacu i ja'e bo lo ralju jutsi be lo tcecmada'u cu binxo lo
   mutce tolci'o gi'e farvi lo mutce certu be lo saske i lo tarci saske cu
   traji lo ka pluka i lo prije cu ze'u catlu lo tsani dacti i lo cecmu cu
   nelci lo nu casnu lo jivna velcki i lo re canko noi se fanra lo stuna
   fa'u lo snanu cu rinka lo re solri nanca noi temci frica i lo re moi
   co'a kansa lo pa moi lo nu se mixre i lo pa moi cu za'u re'u se lidne
   lo re moi ba lo manku temci i ca'o lo nicte lo so'i rorgri cu jbena
   gi'e mrobi'o i lo tcaci datni be lo solri cu co'a jdika lo ka tsali i
   ja'e bo lo tolpa'apre co'u pacna lo nu lo solri ba xruti i lo lunra noi
   culno cu tcica su'o lo traji prije ji'a sai i ca lo xa moi ke clani
   solnanca cu tolcanci fa ko'a goi lo tcecmada'u poi naldu'i se menli i
   ko'a vimcu ro lo purci saske gi'e te cerda lo se darlu je te darlu

   ni'o lo se sruma be ko'a ka'e se tcita lu sidbo be lo kumfa li'u i su'o
   tcila cu toldra i lo kumfa na culno lo pinxe xamgu djacu i ji'a lo
   bitmu na dunli lo jubme gacri lo ka marji i ku'i sa'e nai lo ko'a
   velcki cu jibni mapti lo fatci i ko'a kanji lo te sepli pe lo botpi
   jo'u lo jubme jo'u lo bitmu jo'u lo fagri stuzi kajna jadni jo'u lo
   djedi be li bi zmiku junla fi'o se satci lo mikri ki'u lo nu lo ko'a
   tutci jo'u tadji cu carmi ralci i lo se cupra be ko'a cu se zanru lo
   traji tolkripre

   ji'a sai i ku'i le prije cu se menli lo vrude je tinbe gi'e jdice lo nu
   favgau ji'u lo natmi ranmi i ca lo krasi pu lo nu lo saske cu tolcanci
   cu ranmi lo nu lo pelxu kurfa pe lo berti bitmu cu karbi'o fi lo dacti
   noi nalxanri tcebra zi'e noi ze'a lo so'o rorcedra cu selvi'a muvdu fo
   lo kensa i lo gusni noi ke'a fi lo ka carmi cu zmadu lo solri fi'o
   jinvi su'o da gi'e zmadu lo lunra do'a fi'o jinvi su'o de cu kansa le
   barda muvdu lo nu mluni i ca'o la'e di'u lo botpi cu desku lo lindi
   sance jo'u ckicau jenca i jursa sance lo mlana be lo tsani i lo fanmo
   savru cu sinxa lo nu canci i lo tcecmada'u ca lo nu snada lo nu xruti
   fi lo se jenca cu viska lo nu lo kurfa pelxu diklo cu za'u re'u tcaci
   jvinu i la'e di'u lisri fi lo junri je racli i cu'u lo mleca se ctuca
   lo lisri cu frica i lu ca lo purci je cilce djedi lo tcecmada'u poi
   krinalka'e barda cu nerkla pa'o lo bitmu i bevri jgari lo solri lo
   jgalu i lo nu limna cu rinka lo nu pi ro lo botpi cu desku i lo brabra
   pu lo nu barkla cu frigau lo junla da li'u i lo cecmu cu se spaji lo nu
   le prije cu radzau lo di'u fadni se darlu i lo brabrapre poi bevri lo
   gusni zi'e noi simsa lo pu se viska cu di'i cadzu zo'a lo bartu mlana
   be lo bitmu be lo kumfa i lo nu cadzu zo'a lo canko fa'u lo drata canko
   cu ve ciksi lo re solri nanca i ku'i ko'a za'o co'e i lo tcecmada'u
   munje cu vasru lo traji rirci no'u lo junla noi se pagbu lo dandu jo'u
   lo crane jo'u lo cmaxance i lo so'i zgana rorgri cu birti jarco lo nu
   ge lo dandu cu slilu gi ge lo cmaxance cu muvdu fo lo crane gi ge lo nu
   janbe cu jibni dikni gi ju'o cu'i do'a nai pensi lo te ckini be lo te
   dikni bei lo ve muvdu be fo lo cmaxance i co'a lo krasi lo junla cu te
   denmi lo ka se jundi i jy midju lo ro sinxa be lo te zukte be lo nu
   munje zbasu i lo zbasu noi manku cusku fo lo drata se zbasu cu simlu lo
   ka bacru lo jetnu voksa se pi'o lo junla i lo cevni krici lo nalcevni
   krici cu damba lo junla zbasu se casnu i lo me la niuton tcecmada'u cu
   junla zbasu sarji gi'e darsi smadi lo du'u lo brabra poi bevri lo te
   gusni fu lo kumfa cu bilga lo nu muvdu ja'i lo junla nu muvdu

   ni'o lo jalge be lo nu ko'a lanli cu zi binxo lo te lijda be lo jdasi'a
   i lo ranmi brabra cu gau du lo solri lo zbasu be lo junla i lo nu sinma
   lo junla zbasu cu basti lo purci lijda no'u lo nu pamsi'a lo djacu kei
   e lo nu pamsi'a lo dzena kei e lo cilce nu pamsi'a lo kajna be lo fagri
   stuzi i ro ka vrude cu te kairxu'a lo junla zbasu i lo ro mapti ke
   tcecmada'u se tarti cu gau jmaji lo se tcita be lu junla zbasu se tarti
   li'u i lo drata bende cu xusra tu'a lo tcecmada'utaisre i le prije pu
   xusra lo du'u pi ro lo kensa cu canlu lo djacu i no da mleca fi lo ka
   jetnu se jarco i no da mleca fi lo ka jetnu se jarco se kakne i ze'o lo
   nenri bitmu be lo botpi lo djacu cu sisti i va'o la'e di'u lo misno ke
   junla zbasu cu zvati ma i lo nu jmive cu nibli lo nu djacu i lo nu
   pensi cu nibli lo nu djacu i no da poi na xabju lo djacu cu kakne lo nu
   te sidbo lo temci e ji'a li'a lo junla i e'u mi'o lanli lo se stidi sei
   lo junla zbasu fapro cu cusku i ja'o lo danlu poi xabju lo djacu cu
   ca'o xabju lo bartu be lo djacu i ia nai i xu lo racli tcecmada'u cu
   kakne lo nu ze'a pensi lo tai cizra sidbo i ji'a sai da'i lo nalcumki
   cu fasnu i da'i to se va'u lo nu darlu toi lo jmive je pensi cu kakne
   lo nu zasti ze'o lo bitmu be lo botpi i ki'u ma lo junla zbasu na jarco
   vo'a i frili zy fa lo nu tavla lo tcecmada'u i frili fa lo nu ca lo nu
   zbasu lo junla cu punji lo se jimpe sinxa lo crane i mu'a lo vo ze moi
   se xusra a ji'a sai to va'o lo nu zy djica toi lo tutci be lo nu merli
   lo temci i ku'i ba'i bo fe'e di'i lo milxe dunli cu zvati fa lo na'e se
   smuni morna noi la'a jalge lo nu na kurji i ja'o ei ma'a va'o lo nu lo
   junla zbasu cu zasti cu se xanri lo nu zy na'e certu je xalbo je palci
   gi'e zbasu lo botpi jo'u lo jubme jo'u lo kumfa te zu'e lo nu po'o
   ckasu lo tcecmada'u lo nu betri

   ni'o lo di'u se jinvi rai lo ka vlile cu se cusku lo cabna te pemci i
   lo malmisno pemci be fo lo junla zbasu be'o noi jenca lo cecmu cu se
   krasi di'e

   i tcebra fa lo zekri poi do zukte

   i tcebra tai lo mulno botpi

   i doi junla zbasu mi do talsa

   i lo nu do kusru cu bramau lo vasru

   poi cpana lo kajna be lo fagri stuzi ku'o

   gi'e dunli lo junla crane lo ka cukla

   i do tsali je maljgira

   i lo nu do certu cu banzu lo nu zbasu lo junla

   i ku'i no da prali fi lo nu do tsali je certu

   i lo nu po'o lo vrude tcecmada'u do ca'u catlu

   cu rinka lo nu do se cfipu se ru'u lo do tutci

   i do blabi binxo gi'e mipri do bu'u lo trixe kumfa

   ni'o so'e da jinvi lo du'u lo te pemci cu dukse lo ka mabla cusku i
   da'i lo junla zbasu cu zasti i no da krinu lo nu sruma lo nu zy zanru
   lo nu lo tai se cusku na te sfasa i terpa lo nu pi ro lo botpi cu lifri
   lo nu venfu i lo te pemci ba lo nu se pajni ca lo nu jgira lo rigni se
   cinmo cu se dapma gi'e gubni se daspo i lo jursa se zukte cu rinka lo
   nu jimte ze'a lo so'o rorcedra lo zifre pensi pruxi

   ni'o xanka denpa lo dorkra be lo zemoi ke relsolri nanca i ro darvistci
   pe lo botpi ca'o lo nu lo mokca ca'o jbibi'o cu se farna lo stuna canko
   a lo junla i ba lo fasnu so'i da denpa ca'u lo vorme pe lo tarci saske
   prenu ca lo nu ca'o kanji i su'o da jdaba'u i su'o da tolsi'a ke jdini
   talsa fi tu'a lo jalge i ku'i na se fanmo lo na'e se birti i lo junla
   jo'u lo solri na jarco lo ka satci mapti simxu i lo traji krici na
   snada lo nu jinga salci i ku'i lo te frica cu cmalu i lo tinsa traji be
   fi lo zifre pensi cu sanji lo sivni nu senpi i lu lo junla zbasu cu
   sezja'o se pi'o ro lo se zbasu li'u jo'u lu bandu be lo junla zbasu
   li'u jo'u lu lo jetnu ke junla saske cu se jarco gi'e se ciksi li'u cu
   se finti lo krici lo nu troci lo nu jdika lo ka dunku i lo zifre pensi
   cu vrici finti gi'e zengau lo nu jinga i lo krici ca'o lo nu ge lo
   cacra ca'o fasnu gi lo rorgri ca'o se lidne lo rorgri cu se darxi i lo
   nu krici lo junla zbasu cu ranji jdika i ba zi ku lo junla mi'u sai noi
   suksa muvdu gi'e toldikni dikni cu binxo lo se casnu be lo xalbo

   ni'o ca bo za'a lo pelxu kufra pe lo berti bitmu cu kalri binxo i lo
   junla zbasu cu nerkla gi'e zukte lo nu tongau lo junla cabra

   ni'o lo nu jenca cu traji i lo tcecmada'u pe ro ka nanca jo'u ro klesi
   cu se tisna lo censa stuzi i lo botpi cu tisna lo jdaselsanga i ro
   cinmo danlu pe lo botpi cu bredi lo nu dunda ro lo se ponse te zu'e lo
   nu selfu lo junla zbasu

   ni'o lo junla zbasu ca lo nu mo'u tongau lo junla cabra cu zgana lo
   botpi i zy taske ri'a lo nu pinxe lo birje ca lo purlamnicte i ja'e bo
   zy pinxe pi ro lo se vasru be lo botpi i zy ze'a lo bavlamjeftu be li
   ci cu bilma bu'u lo ckana i lo mikce be zy cu minde lo nu mulno basti
   lo djacu sorcu pe lo vi tcadu pagbu

                fa'o::